引用:
原帖由 kkeeleung 於 1-7-2014 14:03 發表 
牛池灣村內以前真係包羅萬有。我曽經在那處找外發暑期工。小時候會從牛池灣村小路行上後山，山上有舊大石，可謂一個小景點。上山前會經過”金霞精舍”沿路仍留著不小金塔，真有些陰森。行二三十分鐘便到達，之 ...
係呀，以前未起地鉄之前，坪石邨口有一大行小販，好多野食嘅﹗我有個小學同學屋企喺果度開檔，賣沙糖蛋餅
。
重有一兩檔街邊飛髮檔（榕書頭，即係依家地鐵坪石邨出口過少少果個位，牛池灣對面），有公仔書睇㗎﹗我就幫襯老D果個阿伯，五毫子飛個髮。以前一張椅加一個皮喼架生箱，上面棟一塊鏡，就可以揾食﹗阿伯成曰著灰布衫，頭髮短而灰白，手指尾指甲留長左。剪之前阿伯會先用爽身粉幫我地沈下條頸同埋耳邊“的水位”。D粉好香......
依家聞唔返果種味。我最後一次見到阿伯係九二至九三年左右，我果陣時出左黎做野冇耐。阿伯喺兩個地鉄口之間果個位開檔，重係果個皮箱同果塊鏡果套灰色衫。阿伯唔興開囗拉客，佢會用眼望你，等你行過去。果次我趕住去搭巴士，避開左阿伯嘅眼神。
阿伯係專業嘅﹗你可以話因為佢窮，佢冇得揀。我覺得唔係，以前要學一門手藝揾食係要跟師傅嘅，係一件認真嘅事﹗阿伯靠呢門手藝自立，對呢門佢用以立足社會嘅手藝有一份不可以用金錢衡量嘅專重，點會輕易丟低？ 『我係老左，不過我重未退休，我手功夫重喺度﹗』我回憶之中永存住阿伯嘅背影，提住一個皮箱，獨行於石屎森林之間。
我有時都好後悔，我對阿伯太冷漠，—點不念感情，對佢唔住。傷感.....
