藝人講鬼故-[轉載]
官恩娜電器自動開
時間：2012/8
地點：屋企
官恩娜表示因為環保，就算夏天都好少開冷氣，怎知有晚卻發生怪事，她說：「嗰晚瞓喺張床玩iPad，部冷氣機竟然無端端開咗，我以為可能遙控器喺張床上，
自己隻腳唔覺意掂到，所以開咗冷氣，點知望真啲，原來遙控器擺喺好遠，根本冇可能掂到，真係嚇鬼死。嗰日下晝我啱啱同個老外朋友去騎馬，佢有通靈能力，唔
知係咪對得佢多，過咗啲磁場畀我呢？加上就嚟七月鬼節，搞到之後幾日都要搵細妹隻狗陪我瞓，媽咪都笑連鬼都頂唔順要開冷氣嘆吓，其實都唔係第一次發生，之
前電燈同電視都試過自己開咗，因為我同屋企人住，我住三樓，佢哋住樓下，但屋企人冇遇過，淨係我住嗰層有啲咁嘅事發生，好邪！」
高海寧鬧走黐纏鬼
時間：中學
地點：家中
咪神高海寧原來中學時期經常俾鬼「壓」，最恐怖一次，是考試後回家午睡時，見到一個神秘男人坐在自己床邊。高海寧說：「我房門開咗少少，爹哋喺廳度睇電
視，我打側身瞓，但瞓瞓吓突然郁唔到，隱約見到個着西裝嘅男人擘大腳企咗喺我床邊，我淨係見到佢個身，睇唔到樣，嗰陣好驚好驚，後來feel到有人坐咗喺
我張床側邊，因為張床係凹咗入去，我隻腳仲跟住跣咗去佢嗰邊㖭。」高海寧謂翌日不但又再被壓至動彈不得，且自己更有跟對方對話，高海寧說：「講乜嘢我唔記
得咗，但自己已經由好驚變到好𤷪，於是用啲好粗俗嘅說話鬧佢，結果勁鬧之後我就郁得番，而且嗰個『人』再冇出現。」
孫耀威祈禱助驅魔
時間：05年
地點：無錫
孫耀威有次在荒山野嶺拍戲，有個內地女演員突然變得面目猙獰，還發狂猛打人，那個女演員生得細細粒，卻無端變得好像孫悟空咁好打，孫耀威說：「幾個龍虎武
師都捉唔住佢，最後佢終於暈咗，大家抬佢返酒店，佢醒番完全唔記得發生過乜嘢事，點知過咗一陣，佢又再次發作，仲成個人飛起，見人就打，抓到龍虎武師隻手
流晒血。當佢清醒番後，我哋話畀佢知頭先鬼上身，佢好驚係咁喊，我送咗本聖經畀佢，希望可以幫到佢，過咗一排佢都冇再發作，以為冇事啦，點知有次食飯，佢
突然間隻手震晒，好驚咁話：『好似又返嚟呀！』我即刻幫佢祈禱驅魔，好在終於冇事，唔到你唔信。」
古天樂物件離奇墮地
時間：05年
地點：法國尼斯一間古堡酒店
古天樂05年到法國南部為某名牌手錶出席宣傳活動，當時他入住一間有過百年歷史的古堡酒店，他下榻酒店當日，服務員替他拿行李回房時，竟然在樓梯被無形之
物絆倒，服務員連人帶行李由二樓滾落地下，跌傷手和腳。當時古仔已心感不妙，回到房後，怪事更接踵而來，他晚上躺在床上看電視時，發覺衣櫃不停啪啪響，古
仔說：「我專登開個衣櫃嚟睇，聲音又停咗，上番床又繼續有聲，搞到我都唔敢將啲衫擺喺衣櫃入面。跟住戲肉嚟喇，我坐喺床睇電視時，放喺電視機旁邊嘅手提化
妝箱，無端端俾不明物體掃落地，個化妝箱明明擺喺枱中間都可以跌落地下，你話驚唔驚，想轉房又滿晒冇得轉，搞到我晚晚瞓得唔好。」
黎耀祥離奇鎖匙聲
時間：10多年前
地點：海南島
黎耀祥入行20多年經常出埠拍劇拍電影，但恐怖經歷不算多。最叫祥仔印象深刻的，要算10多年前在海南島拍攝DVD影碟期間遇上一件驚心動魄事件。祥仔
說：「太耐時間我已經唔記得套DVD戲名，當年我去海南島拍，演員自己住一間房，好記得嗰晚返到房瞓覺，一合埋眼未瞓着，就聽到有人攞住束鎖匙喺我耳邊搖
嚟搖去。嗰啲聲係喺我耳邊好大聲好響，絕對唔係房外面，嗰陣聽到自己個心都好寒同好驚。當時又唔係三更半夜，我啱啱上床，絕對唔係瞓着咗發緊夢，但我擘大
眼一睇，又乜嘢都冇。不過，呢啲嘢我一向唔係點理，因為我自己問心無愧，我都係嚟開工啫。」
周秀娜窗簾見怪影
時間：去年
地點：馬來西亞雲頂
周秀娜去年到馬來西亞登台，其間獲安排在空檔時到雲頂一遊，她說：「嗰次我一入到間酒店都有唔舒服嘅感覺，check in咗我同助手各自返房休息，我有個習慣會同助手交換後備匙卡，方便不時之需。點知我返房後發現拎漏嘢，於是放低行李就過去隔籬助手間房。」
娜姐插入匙卡即推門入內，女助手當時背着房門在收拾東西，眼利的娜姐看到窗簾後有人影，她猶有餘悸說：「我見到窗簾後匿埋一個長髮女子，我嚇到出唔到聲，
猛咁揮手示意助手快行出嚟，但助手又唔醒目。」事後娜姐把眼見的實情告訴女助手，她嚇到打冷震，娜姐說：「佢成晚唔肯再返去間房，結果嚟咗我房過夜。」
曹永廉紮營俾石掟
時間：約30年前
地點：馬灣
十幾歲時，曹永廉等六個男仔去露營，坐船入馬灣還要行一個小時去沙灘紮營，整個沙灘得他們一個營，附近只是石崖，怎知怪事便發生，曹永廉說：「第一晚我哋
起咗火就喺營裏面傾偈，突然有人用石仔掟我哋個營，即刻出去睇係邊個，但視線範圍內冇嘢，大家就諗邊個整蠱，仲講晒粗口，不過鬧完都冇反應。我哋返入營再
傾，但幾分鐘後就有一百幾十粒石仔好似落雨咁掟過嚟，我哋再衝出去睇，又係乜嘢都冇，周圍搵都唔見人，我哋就知瀨嘢，咁夜又走唔到，有朋友跪地道歉講對唔
住，又有朋友叩頭話我哋嚟玩一日好快走，果然道完歉後就靜晒冇事。第二日嗱嗱臨走，出到去經過村民屋企，好奇問人係咪有鬼，個居民竟然若無其事咁話係呀，
周不時有隊日本兵喺度行㖭，再俾佢嚇咗一嚇，走都走唔切。」
Jeana夜半鬼敲門
時間：上月
地點：廣州
𡃁模何佩瑜（Jeana）近日頻頻北上吸金，最近更到廣州趕拍電影《鬼愛》，劇情講述Jeana為情自殺，拍攝時匆忙，收工又忘了收利是，結果Jeana
凌晨收工返酒店就遇上怪事，她說：「凌晨3點幾返到酒店房，我攰到死死吓，攤喺床半夢半醒聽見不停有人敲門，我幾經掙扎爬起身開門，以為劇組同事搵我去消
夜，點知開門人影都冇。」如是這般幾次食白果，Jeana索性唔理大覺瞓，她說：「我隱約聽到耳邊有人猛咁講『乜你唔係死咗㗎咩，點解仲喺度？』」天光我
醒時發現喺助手房間，她說：「助手話我半夜搬竇過去，跟住佢第二日陪我返房，間房真係亂七八糟。見過鬼怕黑，我即刻要求劇組轉酒店。」
陳冠希撞正紅衣女鬼
時間：09年
地點：吉隆坡某五星酒店
陳冠希（Edison）於09年到大馬吉隆坡出席商演活動，他下榻某五星酒店，晚上在房間客廳看電視時，突然窗簾布被怪風吹起來，但房裏面窗戶全鎖了，到
底風從哪裏來？Edison接受訪問說：「我睇住有個長髮嘅紅衣女喺窗簾布飛出嚟，當時真係俾佢嚇一嚇，不過佢嘅樣我睇唔清，好似好模糊咁，呢個時候，我
連NBA籃球賽都唔睇，即刻上床大被蓋過頭瞓覺，乜都唔理喇！」原來Edison從小對靈界的存在特別敏感，他說：「細個時，初初見到會有啲驚，大大吓就
習以為常，反正佢哋有佢哋世界，我哋有我哋世界，唔理佢哋就得，通常撞到呢啲嘢，唔好理佢就得，唔好咁在意。」
黃智雯乾坤大挪移
時間：四年前
地點：南非約翰尼斯堡
當年做空姐的黃智雯跟機去了南非，和其他同事在一間近郊的酒店落腳，誰料卻住進了陰森酒店，黃智雯說：「間酒店好偏僻，附近係森林，大家已經感覺唔係咁舒
服。我間房仲有個偏廳擺咗啲傢俬喺度，第一晚住落冇事，第二朝出咗去食完飯返房後，個廳啲梳化、枱嘅擺法全部俾人轉晒，我出埠唔鍾意俾人入房執嘢，所以必
定掛咗個請勿騷擾嘅牌喺門口，但我問過同事及酒店嘅人都話冇人入過去，真係嚇儍咗，咪即刻要求換房囉，第二日同其他同事離開，不過我一直唔敢講，直到上咗
機回程返香港至敢講出嚟，怕嚇親其他同事。」
